ساق البامبو وروايات أثير النشمي ♥

السلام عليكم 

كيف حالكم ان شاء الله بخير 💅 ؟

اليوم بحكي عن 4 كتب (روايات)

اول كتاب اللي هوا ساق البامبو للكاتب سعود السنعوسي 

هيا رواية ، جميلة جميلة جميلة بشكل ماينوصف حبيتها كثير وحبيت قصتها اللي ممكن تكون نادرة 

احداث الرواية تدور عن ولد اسمه خوزيه (عيسى) ، امه خادمة فلبينية عند عائلة الطاروف الكويتية ، تعرفت على ابو خوزيه وتزوجته بالسر وحملت منه وبعد كذا رجعت الفلبين وكان ولدها صغير ، يكبر الولد ويبدأ يبحث عن اهله الكويتيين وتبدأ قصته ومعاناته معهم.

بالنسبة لي هذي اول رواية اقراها من الروايات اللي قصصها عن العمالة وحبيها بصراحة ! 

الاشياء اللي حبيتها فالرواية انه بيّن مجموعة من الناس العنصريين من ناحية الجنسيات ، وكيف يصفون الاجانب الاشياء الغريبة اللي عندنا زي خوزيه لمن وصف العقال وكان يقول : الحلقة السوداء المثبتة فوق غطاء الرأس، ولمن كان يوصف رقصة الخليجين  در 

وردة فعل خوزيه لمن شاف القرقيعان وعادات وتقاليد الكويتيين وكيف كان مستغرب. 

نقل الكاتب بعض اراء الاجانب وكيف ينظرون لأشيائنا العادية بنظرة مختلفة. 

حملتها على الايباد ، وهذا الرابط : 

http://akhbar1news.blogspot.com/2013/05/pdf.html

تقييمي للكتاب 5/5 , كتاب جميل جدا 💞

 

ثاني كتاب (رواية)

 في ديسمبر تنتهي كل الاحلام ، للكاتبة اثير النشمي 🌸

اول شي رواية هذي رواية انا مرة حزنت لمن خلصتها ): !

اسلوب الكاتبة جمميل ججميل بشكل محد يوصفه ، بس معرف ليش حبيت روايتها احببتك اكثر مما ينبغي اكثر من هذي الرواية !

قصة الرواية :

رجل ماحب المجتمع اللي هوا فيه ، صحفي وقرر انه يهاجر لأي بلدة تناسبه هاجر لنيوزلندا وحب عازفة كمان ، تعلق فيها وحبها وهوا مايعرف اسمها ..

كانوا يتقابلون كثير ويتكلمون وحبوا بعض وهوا مايعرف هذي البنت من وين واش اسمها وبعد كذا...

خلاص الباقي تقرونه فالرواية :))

ثالث كتاب ،  رواية للكاتبة اثير 

اللي هيا رواية احببتك اكثر مما ينبغي 

قصة للناس الحبيبّة تتعب بصراحة :( 

انا كل رواية الحب عندي تتعب هههههههههههههه

قصتها : 

جمانة وعبدالعزيز تعرفوا على بعض فكندا وهما يدرسون وكل واحد حب الثاني اكثر من نفسه !

قصة حبهم مرة جميلة يتزاعلون ويتراضون وبعدين تكتشف انه يسوي شي من وراها وفالنهاية يصير الشي اللي مقدر اقوله ...:) 

الرواية كلها تتكلم بلسان البطلة جمانة والاحداث اللي تصير لها بدون عبدالعزيز ومشاعرها وهيا معاه 

اما الجزء الثاني وهيا رواية فلتغفري تتكلم بلسان البطل عبدالعزيز ، تقريبا نفس الاحداث الموجودة فالجزء الاول لكن كان عبدالعزيز يتكلم ويبرر ويقول قصص ومواقف صارتله مي مذكورة فالجزء الاول. 

الروايتين بصراحة شي يجنن ونفس اسلوب الكاتبة يخليك تتحمسين انك تكملين وماودك الرواية تخلص ، يعني تقريبا هذي الروايتين كانت من اللروايات اللي تأثر على مزاجي يعني لو وقفت عند موقف انهم متزاعلين وصار شي يحزن وكذا ازعل واتضايق ولو كان موقف جميل افرح معاهم. 

حتى حسيت انهم ناس عايشين معايا ولمن خلصتها لحد يسألني قد ايش زعلت :'(

انا حبيت روايات الكاتبة اثير وحبيت اسلوبها وكل شي جميل ماشاء الله تبارك الله فرواياتها 🌸

بالنسبة لروايات اثير النشمي موجودة فأبلكيشن اسمه المكتبة الجامعة ، قسم القصص والروايات ورواية احببتك فقسم الاكثر تحميلاً وموجودة كمان فقسم الروايات 🌸

وبس هذي كانت الروايات اللي قريتها الفترة هذي وان شاء الله تقرونها وتعجبكم وكذا :$ 

مع السلامة 💖