April book's ♥️♥️
السلام عليكم
كيفكم يااللي تقرون 😻
ان شاء الله تكونون بخير دايماً
الكتب اللي بتكلم لكم عنها ان شاء الله :
رواية امين
رواية شرفة الهاوية
رواية انقذني
كتاب خوارق اللاشعور
رواية حب في زمن الجاهلية - اخذته استعارة ومالحقت اصوره معاهم-
ببدأ ف أول كتاب اللي هو /
امين لمعجب الشمري
اولاً حجم الكتاب صغييير مرة وهذا اللي قهرني.
بس بصراحة حلو ، كلماته على انها حزينة جداً الا انها اعجبتني
الصياغة والفصاحة اسرتني جداااا
لدرجة وانا اقرا كل بعد ما اقرا صقحتين او ثلاثة احدد بالمرسام من كثر ماهو حلو
والغلاف ي ج ن ن وهو من تصوير شموخ الشمري ، ومعروف تصوير شموخ انه يجنن ❤️
.
نجي للكتاب الثاني
رواية شرفة الهاوية ل إبراهيم نصر الله
هذا الكاتب كنت متحمسة اقرا له من فترة واخذت هذا الكتاب
القصة انهم ٣ اشخاص
وزير ، استاذ جامعي ، محامية
كل واحد منهم اخلاقه مضادة تماماً للمكان اللي انحطوا فيه ، الوزير ينهب الاموال ، الاستاذ اخلاقه غير شريفة ابدا ، المحامية حتى نفسها ماتنصفها ..
سيناريو مكرر ونشوفه دايم فمجتمعاتنا العربية "مو الكل" ،
احداثها حلوة ومو حلوة بس حسيت انها واقعية ومقرفة زيادة عن اللازم
بس اللي حبيته فيها اللغة والسرد مرة ماشاءالله جميلة ، وعلى اخر الصفحات حسيتها حلوة شوي بس .
بس لسى احس ان فيه كتب ل ابراهيم جميلة وماراح احكم من اول كتاب قريته له
اقيمه ب ٣ نجمات ع فكرة الغلاف والاسلوب واللغة
.
.
رواية انقذني للكاتب غيوم مسيو
"خيال علمي"
مرة حلوة ومشوقة واحس ما ودي اقفل الكتاب :(
اصلا الكتاب حسيته كأنه فلم وكل روايات هذا الكاتب بالشكل هذا
احداثها تدور حول جولييت اللي حست ان كل الطرق تقفلت فوجها ، والدكتور سام اللي يأس من الحياة بعد وفاة زوجته
حصل بينهم موقف وتعرفوا على بعض ، وبعدها سافرت جولييت وانفجرت الطيارة.
ماحرقت النهاية بس اصلاً الاحداث تبدأ من هنا *,*
احداااث كثيرة بين الشرطية كريس والبنت جودي
هيا اكشن ودراما وخيال ولحسة مخ ههههههه
بس والله مرة بطلة الرواية اقيمها ب ٥ نجمات.
.
.
نجي للكتاب *القنبلة*
خوارق اللاشعور
الكتاب هذا عمره اكثر من ٦٠ سنة تقريبا ، ولمن قريته جالسة احس كأنه يوصف بعض الفئات موجودة حاليا فمجتمعنا
، يتكلم عن خوارق اللاشعور او القوى الكامنة الموجودة في العقل وكيف ان لها تأثير قوي على اكثر من شي فحياة الانسان.
الكتاب يتكون من خمس فصول
1-الاطار العقلي /
-"عقل الانسان مقيد بالعادات والتقاليد والتربية ، عقل الانسان غير حر ابداً وهذي القيود ممكن تمنعه من انه يبدع فبعض الاشياء"
والناس العباقرة هم اللي قدروا يتحررون بشي بسيط من اطارهم الفكري او العقلي.
2-المنطق الارسطوطاليسي /
هذا الفصل يتكلم عن المنطق وبصراحة ماعرفت الخصه 😂.
3-الارادة والنجاح /
كان يقول هنا بأن الارادة احيانا ماتوصّل الشخص للشي اللي يبغاه
ومقولة "من جد وجد .." مقولة خاطئة
وبأن الحالة النفسية للشخص هي الاساس اذا كان يشتغل بجد بس داخله محبط ما راح يوصل للي يبغاه.
وتكلم عن الحظ !
وعن الناس كيف ماخذين فكرة عن الحظ
ذولا الناس انا وياهم دايم ف زحمة 😅
وبأنك كل ماكررتي هذي الكلمة راح يصير فعلاً حظك سيئ ، والدليل الحديث الشريف (انا عند ظن عبدي بي)
ووصفهم بأنهم ناس فاشلين ودايم ينسبون نتايج افعالهم للحظ علشان ماينسبون فشلهم لنفسهم.
وفمجتمعاتنا الشرقية بعض الناس مايحبون انهم يمدحون احد بسبب الخوف من العين والحسد
وعلشان كذا اغلب الناس نفسياتهم محطمة لانهم اذاجاتهم فكرة ممكن انها ترفعهم وتشغل حياتهم بالشي المفيد وتكون مصدر رزق لهم!، لكنهم يكتمونها لانهم خايفين من كلام الناس ومن الحسد والعين.
يارب وضحت هذي النقطة .
4- خوارق اللاشعور /
من احلى الفصصول 😭
استمعت فيه جداً
شرح بالتمام قصده عن خوارق اللاشعور او القوى الباطنة وكيف احياناً تسير الشخص للخير ومرات للشر
وقصص ناس تشافو بتأثير نفسي .
5- النفس والمادة /
علاقة النفس بالمادة يعني زي لمن تستحي تحمر خدودك.
وهذا الفصل فيه قصص تتعلق بالنفس والمادة.
منهم هذي القصة /
ان مرة شخص على مسرح وزع كور على الجمهور وقالهم ان هذي ساخنة جداً وهي باردة الكور ! ، وحمرت يديهم وجلسوا يصرخون من حرارتها لانهم صدقوا لدرجة ان بعض الناس طلعت اثار حروق بيديهم :/ .
رأيي فالكتاب /
احس واضح من الصك اللي كتبته فوق عن الكتاب :D
عن نفسي حبببيته مرة ومستحيل افرط بهذا الكتاب لان كلمة يجنن قليلة عليه !
. صحيح ان الكاتب كنت اعارضه على بعض الاشياء بس اقرا كم صفحة ويقنعني بسهولة :| ،
وهوا بصراحة متناقض جداً يتكلم عن معلومة ويهاوش عليها وفنهاية الفصل يثبتها ويأيدها بحجج والعكس 😂
بس استفدت بصراحة منه كثير .
والكتاب على حسب علمي ممنوع فالسعودية لانه كان الكاتب يتكلم عن بعض الاشياء الغيبية بطريقة فيها لفة.
وكاتب تحذير بداية الكتاب يعني برا ذمته الادمي D:
وكويس اني وصيت كتابه الثاني مهزلة العقل البشري ، ان شاء الله يكون حلو زيه.
اقيمه ب ٥ نجوم ولو فيه اكثر ماترددت اني ازيد *.*
الكتاب الاخير واللي مو موجود لاني قريته ورجعته لصحبتي
"رواية حب في زمن الجاهلية "
من الكتب اللي تحمست لها ممممرة
تتكلم عن اثنين حبوا بعض ويحاول انه يوصل لها ويتزوجها الا ان متوقع انهم يرفضون لان مابينهم دم !
اولا الكتاب مافيه احداث الا حدث واحد بسس !
الحوارات تنعد ع الاصابع قليلة مرة
اكيد بتتسائلون اش فيه دام لاحوارات ولا احداث ؟
كل اللي فيه مشاعر 💘
ثلاث ارباع الكتاب وهوا يوصف مشاعره لها كيف يحبها وكيف يغار ، وهيا توصف حبها وخوفها
وصف المشاعر عنده فضيع ): لامست قلبي كلماته والله حزنت :(😂.
جد بالرغم انه بعيد كل البعد عن الرواية بس كلامه حلو
اعطيه ٣ نجمات .
وبكذا نكون خلصنا ، وكل الاقتباسات من هذي الكتب صورتها وحطيتها ف تمبلري 💘
http://reeman2.tumblr.com
اسعار الكتب /
خوارق اللاشعور ٨٠ جنيه ، ٤٠ ريال - مكتبة مدبولي
انقذني / ٥٨ ريال - بوك تشينو
شرفة الهاوية / ٣٥ ريال - فيرجن
آمين / ٥٥ ريال - متجر بيان للكتب
ْحب في زمن الجاهلية / ٥٠ ريال ، متجر بيان
ولو حابين تستعيرون هذي الكتب تقدرون تستعيرونها ب نص المبلغ من متجرنا "متجر أثر للاعارة"
وشكراً لكم 🌷.
تعليقات
إرسال تعليق